Ég er ekki alveg nýbyrjuð að blogga en ég byrjaði með hópi af flottum stelpum í nóvember 2017 á síðu sem hét Framinn.is. Ég opnaði svo mína eigin síðu hildurrut.is í október 2019, færði mig yfir á Trendnet.is í mars árið 2020 og nú aftur 6 árum síðar er ég að opna mína eigin síðu hildurrut.is.

 

Þetta byrjaði allt saman eftir að ég gaf út bókina Avocado fyrir jólin 2016 en þá bók sá ég alfarið um sjálf. Ég þróaði uppskriftirnar, tók ljósmyndirnar og sá um alla hönnun og útgáfu. Bókin var upphaflega hugsuð sem lokaverkefni í margmiðlunarnámi en þróaðist fljótt í mun stærra verkefni. Eftir útgáfu bókarinnar komst hún fljótlega á metsölulista en í henni er að finna uppskriftir sem allar eiga það sameiginlegt að innihalda avókadó. Ég opnaði instagram aðganginn minn í kjölfarið en þar hef ég sýnt frá matargerðinni, sett inn uppskriftir og fleira skemmtilegt. Fyrir jólin 2019 tók ég þátt í að gefa út bókina Vinsælustu uppskriftirnar frá vinsælum matarbloggurum, sem er samstarfsverkefni sex matarbloggara. Ég sá um hönnun bókarinnar ásamt því að taka myndir fyrir utan uppskriftamyndirnar frá hinum matarbloggurunum. Þetta allt saman hefur verið skemmtilegt hliðarverkefni sem ég hlakka til að halda áfram með á nýrri síðu.