JALAPENO- & CHEDDAROSTASTANGIR

Mjög einfaldar og ljúffengar ostastangir með cheddar osti og jalapeno sem rífur aðeins í. Í uppskriftinni eru einungis 4 innihaldsefni ásamt salti og pipar. Tilvaldar í veisluna eða partíið. Ég hef nokkrum sinnum verið með þær í veislum og þetta er alltaf jafn gott! Mér finnst gott að bera stangirnar fram með sýrðum rjóma eða blanda saman sýrðum rjóma, avocado, smá sítrónusafa, salti og pipar.

Uppskrift gerir 12 stangir 300 g tilbúið smjördeig 1 eggjarauða 1/2-1 dl jalapeno úr krukku 4 dl cheddar ostur Salt og pipar

Aðferð

1. Rífið cheddar ostinn og skerið jalapeno smátt.

2. Fletjið deigið út í tvo eins fleti, ca. 30×40 cm ferninga á sinn hvorn bökunarpappírinn. Penslið annan ferninginn með helmingnum af eggjarauðunni.

3. Dreifið helmingnum af ostinum og öllu jalapenoinu jafnt yfir. Saltið og piprið.

4. Leggið hinn ferninginn af deiginu yfir. Gott að vera með bökunarpappírinn á deiginu og draga hann síðan rólega af. Þetta kemur í veg fyrir að deigið slitni.

5. Penslið með afganginum af eggjarauðunni. Stráið restinni af ostinum yfir og skerið í 12 sneiðar. Takið sneiðarnar upp eina í einu og snúið upp á þær.

6. Leggið þær á bökunarplötu þakta bökunarpappír og bakið við 200°C í 12-15 mínútur.

Verði ykkur að góðu & njótið! ❤️

// HILDUR RUT

INSTAGRAM: @hildurrutingimars 

TIKTOK: @hildurruti