ÍTALSKAR KJÖTBOLLUR & PARMESAN KARTÖFLUMÚS
- Jan 1
- 2 min read
Þessar kjötbollur klikka ekki. Einfaldar og fljótlegar ítalskar kjötbollur bakaðar í ofni með ferskum mozzarella og bornar fram með parmesan kartöflumús. Kjötbollurnar eru bragðgóðar og ekki skemmir fyrir að þær eru bakaðar í ofni með tómat passata og ferskum mozzarella. Toppaðar með ferskri basilíku sem setur punktinn yfir i-ið. Einnig er gott að bera kjötbollurnar fram með spaghettí í staðinn fyrir kartöflumús.
Uppskrift gerir 20-24 kjötbollur 500 g nautahakk 1 egg 1/2 laukur 1 dl brauðrasp 2 dl rifinn parmesan ostur Salt og pipar Ítölsk hvítlauksblanda (frá Pottagöldrum) Ólífuolía Ferskur mozzarella ostur (125 g eða meira) Fersk basilíka 350-400 g tómat passata
Parmesan kartöflumús fyrir 2-3 5-7 kartöflur 1 dl parmesan ostur 3 msk smjör 3 msk rjómi Salt og pipar Hvítlaukskrydd Fersk steinselja
Aðferð:
Skerið laukinn mjög smátt og blandið saman við nautahakk, egg, lauk, brauðrasp og parmesan ost. Kryddið með ítalskri hvítlauksblöndu, salti og pipar.
Hnoðið þessu vel saman og notið hendurnar til að móta 20-24 kjötbollur.
Hitið pönnu vel á miðlungshita og steikið þær upp úr olíu.
Hellið tómat passata yfir þegar kjötbollurnar eru orðnar steiktar að utan. Bragðbætið svo sósuna með hvítlauksblöndunni, salti og pipar.
Skerið mozzarella í sneiðar og dreifið þeim yfir kjötbollurnar.
Ég nota pönnu sem má fara inn í ofn og eru bollurnar bakaðar við 190°C í 15-20 mínútur. Ef að þið eruð ekki með pönnu sem má fara í ofn þá setjið þið kjötbollurnar ásamt sósunni í eldfast form, dreifið mozzarella sneiðunum yfir og bakið.
Dreifið að lokum basilíku þegar kjötbollurnar eru komnar úr ofninum og berið fram með kartöflumús.
Parmesan kartöflumús
Skrælið kartöflurnar og skerið þær í tvennt.
Sjóðið í kringum 20-30 mínútur, tíminn fer eftir stærðinni á kartöflunum.
Sigtið vatnið frá og bætið smjöri, rjóma, parmesan osti, salti, pipar og smá hvítlaukskryddi út í. Það er smekksatriði hvernig þið viljið hafa áferðina á kartöflumúsinu. Bætið því rjóma eða smjöri eftir smekk og stappið vel saman.
Verði ykkur að góðu & njótið! ❤️
// HILDUR RUT
INSTAGRAM: @hildurrutingimars
TIKTOK: @hildurruti
Comments