FYLLT AVÓKADÓ MEÐ EGGJUM

Þessi réttur er tilvalinn í helgarbrönsinn, einnig gott sem morgunmatur eða millimál. Einfalt og gott avókadó fyllt með eggjum, bakað í ofni og borið fram með parmesan osti, sítrónusafa, steinselju og radísuspírum. Ég er með svipaða uppskrift í Avocado bókinni nema þar nota ég rifinn mozzarella í stað parmesan osts.

3 þroskuð avókadó

6 lítil egg

Salt og pipar

Safi úr sítrónu

Rifinn parmesan ostur

Fersk steinselja, söxuð

Radísuspírur

Aðferð

1. Skerið avókadó í tvennt og skafið úr því til þess að gefa egginu pláss.

2. Brjótið eggið í skál og hellið ofan í avókadóið. Ef það er lítið og eggin stór þá passar ekki öll eggjahvítan ofan í það. Þá er gott að geyma restina og nota í eitthvað annað.

3. Saltið og piprið fyllta avókadóið og bakið í u.þ.b. 10-15 mínútur við 190°C eða þar til eggið er tilbúið.

4. Kreistið safa úr sítrónu yfir og stráið parmesan osti, steinselju og radísuspírum yfir allt saman.

Verði ykkur að góðu & njótið! ❤️

// HILDUR RUT

INSTAGRAM: @hildurrutingimars 

TIKTOK: @hildurruti