HOLLIR & EINFALDIR KÍNÓAKLATTAR

Hollir og ljúffengir klattar sem innihalda kínóa, hampfræ, spelt og cheddar ost. Ég nota kínóa mjög mikið í alls kyns rétti en það er bæði mjög hollt og mettandi. Ég sýð alltaf mikið í einu og nota í nokkra daga. Það er t.d. mjög gott að setja það í salöt, nota það sem meðlæti með fiski eða kjöti, í grænmetisrétti, í boost, með eggjum og svo lengi mætti telja! Upphaflega gerði ég klattana fyrir dóttur mína Eddu sem er 19 mánaða í dag og vill helst borða allt sjálf (mjög sjálfstæð þessa dagana). Hún elskar þessa klatta! Ég sker klattana í bita fyrir hana og hún borðar þá með bestu lyst. Mér finnst þeir líka mjög góðir og gott að setja á þá avókadó, grænmeti, ost eða það sem hugurinn girnist.

Uppskriftin gerir 7-8 klatta 2 egg 2 dl kínóa, soðið 1 dl rifinn cheddar ostur 2 msk hampfræ 1 dl spelt 1 msk ólífuolía Salt og pipar

Aðferð

1. Skolið kínóað og setjið í pott. Bætið vatni saman við. Hlutföllin eru 1 dl af kínóa á móti 2 dl af vatni. Sjóðið í 15-20 mínútur. Mér finnst gott að sjóða slatta af kínóa og nota í ýmsa rétti næstu daga.

2. Blandið saman kínóa, hampfræjum, spelti, cheddar osti og kryddið með salti og pipar.

3. Bætið eggjum og ólífuolíu út í og hrærið.

4. Steikjið á pönnu þar til klattarnir verða gylltir og stökkir.

5. Berið fram með smjöri, osti, avókadó, grænmeti eða því sem ykkur dettur í hug.

Verði ykkur að góðu & njótið! ❤️

// HILDUR RUT

INSTAGRAM: @hildurrutingimars 

TIKTOK: @hildurruti