HEILL OFNBAKAÐUR KJÚKLINGUR MEÐ RJÓMAOSTASÓSU

Jun 10
2 min read

Þetta er klassískur matur sem er tilvalinn á sunnudagskvöldi. Uppskrift sem ég hef margoft gert og klikkar aldrei. Safaríkur heill kjúklingur hægeldaður með lauk, gulrótum, sítrónum og hvítlauk. Síðan verður soðið í botninum að silkimjúkri rjómasósu sem er einn besti parturinn. Fullkomið með ofnbökuðum kartöflum, fersku salati og köldu hvítvíni.

Fyrir 4–6

1 heill kjúklingur (ca. 2 kg) 2–3 gulrætur 2 gulir laukar 1 heill kjúklingur 1 sítróna 5 dl vatn 2 msk Oscar kjúklingakraftur Ólífuolía 1–2 tsk ítölsk kryddblanda Salt og pipar 2 msk smjör

Sósa 1 msk smjör 1 msk hveiti Soðið úr pottinum 1–2 dl rjómi 1–2 msk Philadelphia rjómaostur 1/2–1 tsk dijon sinnep Meiri Oscar kjúklingakraftur eftir smekk Salt og Pipar

Aðferð

Hitið ofninn í 170°C.
Skerið gulrætur og einn og hálfan lauk í grófa bita. Setjið gulræturnar, laukinn og 1/2 hvítalauk í botninn á steypujárnspotti eða eldföstu móti.
Hitið vatnið og hrærið Oscar kjúklingakraftinum saman við þar til hann leysist upp. Hellið soðinu yfir grænmetið.
Skerið sítrónu í nokkra bita og setjið inn í kjúklinginn ásamt hálfum lauk (skorinn í bita) og hvítlauksrif úr hálfum hvítlauk. Nuddið kjúklinginn með ólífuolíu og kryddið vel með salti, pipar og ítalskri kryddblöndu.
Setjið kjúklinginn ofan á grænmetið, dreifið smjörinu yfir og lokið pottinum. Ef þið notið eldfast form má setja álpappír yfir. Bakið í 90 mínútur með loki.
Takið lokið af pottinum og ausið mestu af soðinu yfir í skál. Hækkið hitann í 220°C og bakið áfram í 20–30 mínútur eða þar til húðin verður fallega gyllt og stökk. Ef þið viljið extra stökka húð má setja grillið á síðustu 3–5 mínúturnar.
Takið kjúklinginn úr pottinum og leyfið honum að hvíla í 10–15 mínútur áður en hann er skorinn.
Bræðið smjör í litlum potti og hrærið hveitinu saman við. Látið malla í um 1 mínútu á meðan hrært er stöðugt.
Hellið soðinu smám saman út í og hrærið vel á milli svo engir kekkir myndist.
Bætið rjóma, rjómaosti, sinnepi og meiri Oscar kjúklingakrafti út í eftir smekk. Látið sósuna malla í nokkrar mínútur þar til hún verður silkimjúk og hæfilega þykk. Smakkið sósuna til með salti og pipar ef þarf.
Berið fram með ofnbökuðum kartöflum, fersku salati og köldu hvítvíni. Njótið.